Маладыя дэмакраты | Young Democrats

«Маладыя дэмакраты» (МД) гэта моладзевая арганізацыя Аб'яднанай грамадзянскай партыі Беларусі, заснаваная ў 2007 годзе, якая дзейнічае на аснове Статута АГП і Палажэння аб заснаванні моладзевай арганізацыі АГП «Маладыя дэмакраты». Моладзевая арганізацыя АГП «Маладыя дэмакраты» аб'ядноўвае маладых людзей Беларусі, якiя падзяляюць ліберальна-кансерватыўныя каштоўнасці, лічаць правы чалавека вышэй за інтарэсы дзяржавы. Мы выступаем за нацыянальны суверэнітэт Беларусі, за дэмакратыю, за рыначную эканоміку, за недатыкальнасць прыватнай уласнасці і за еўрапейскі вектар развіцця і інтэграцыі для Беларусі. Мы бачым Беларусь, як сучасную дэмакратычную еўрапейскую дзяржаву, з рыначнай эканомікай, незалежным судом, уладай, якая абiраецца i здае справаздачу народу, адкрытым грамадствам. У такой дзяржаве малады чалавек не шукае магчымасці пакінуць краіну і з'ехаць у пошуках лепшага жыцця. Тут малады чалавек не абавязаны без сваёй згоды аддаваць доўг Радзіме ў выглядзе службы ў войску, тут няма абавязковай рэгістрацыі, без якой немагчыма знайсці працу альбо вучобу, тут няма абавязковага размеркавання студэнтаў у стылі савецкай сістэмы. У грамадстве не існуюць стэрэатыпы як павінен апранацца і выглядаць чалавек, тут кожная асоба індывідуальна. Дзяржава не навязвае грамадству або якім-небудзь сацыяльным групам якім чынам яны павінны думаць і выказваць свае думкі.