Моладзь БНФ

Хто мы такія? Кожны з нас – яркая індывідуальнасьць, кожны з нас – студэнт альбо школьнік, кожны з нас будуе пляны на будучыню і марыць, кожны з нас нарадзіўся ў Беларусі і зьвязвае свае мары пра будучыню менавіта зь ёй. Разам мы – Моладзь БНФ. Мы – моладзь старэйшай Партыі Беларусі, Партыі Беларускага Народнага Фронту. У нас падобныя погляды на дэмакратыю, на месца чалавека ў палітыцы, на грамадзянскую адказнасьць і культуру. Мы маладыя і амбіцыйныя, мы прагнем пераменаў і здольныя дасягаць пастаўленых мэтаў. Нашая краіна – Беларусь, нашая мова – беларуская, мы – будучыня нашай краіны. Нашая дзейнасьць Моладзь і культура Сябры Моладзі БНФ творчыя людзі. Моладзь БНФ аб’ядноўвае студэнтаў творчых ВНУ краіны, дызайнераў, мастакоў, пісьменьнікаў, рэжысёраў, актораў, музыкаў. Мы ладзім сустрэчы зь беларускімі паэтамі – ужо вядомымі і маладымі. Беларусь мае сваё мастацтва, свой шлях у тэатры, мастацтве, музыцы і кіно. Мы самі ствараем новае беларускае мастацтва, памятаем гісторыю, шануем яе і робім ўсё, каб яе ведалі вы. Кіно па-беларуску, кнігі па-беларуску, беларуская музыка – тое, чым мы займаемся ў галіне культуры. Моладзь і палітыка У нас адбіраюць ільготы – мы не маўчым. Пікеты, мірныя акцыі пратэсту, збор подпісаў – так мы дэманструем сваю пазыцыю. Мы балятуемся ў мясцовыя саветы, каб прымаць рашэньні, каб паўплываць на лёс сваёй краіны. Мы працуем на кандыдаў у парлямэнт ад Партыі БНФ, на кандыдата ў прэзыдэнты ад БНФ. Мы, моладзь нашай Партыі, заўтра будзем балятавацца ў парлямэнт. Моладзь і адукацыя Мы атрымоўваем адукацыю, кожны з нас сканчвае школу, паступае ў беларускія ВНУ, мы сумяшчаем грамадзкую дзейнасьць з вучобай, мы праводзім сустрэчы пісьменьнікаў са студэнтамі і школьнікамі. Мы атрымоўваем самастойную грамадзкую адукацыю. Мы ўпэўненыя: будучыня за адукаванымі людзьмі, таму мы імкнемся атрымаць якасную адукацыю. Моладзь і адпачынак Мы ўмеем адпачываць. Летнія адпачынкі ў розных кутках Беларусі з купаньнем у рэчцы і гульнёй у футбол. Вясёлыя вечарыны, Новы Год, Дзень Сьвятога Валянціна, Дні народзінаў нашых сяброў. Моладзь БНФ – гэта кола сяброў і аднадумцаў. Мы ўмеем ня толькі працаваць разам, але і адпачываць, мы сутыкаемся зь цяжкасьцямі, але кожны зь сябраў Моладзі БНФ ведае, што пры любых складаных абставінах жыцьця ён знойдзе падтрымку тут. Мы – Моладзь Беларускага Народнага Фронту і гэта гонар для кожнага з нас!