Коми календар. 2009

31 подписчиков

Коми том войтырлöн "МИ" котырö пырысьяс лöсьöдiсны 2009 во вылö "Коми календар". Корам ставнысö волыны да миянкöд öтвылысь донъявны тайö небöгсö. Ыста корöмсö ставныслы, кодöс тöда, сы вöсна, медым тöдiнныд миян лоöмторъяс йылысь, кöть эськö и тöда, мый унаöн олöны оз Сыктывкарын и локнысö оз вермыны. Коми календар лöсьöдöм мöвпыс воис Ижкарын 2007-öд воын. Сэнi вöлi «Суоми-Россия» котырöн дасьтöм проектъяс гижны велöдан сессия, кытчö чукöртчылiсны фин-йöгра общественнöй котыръясысь водзмöстчысьяс. Велöдчöм бöрас вöлi лöсьöдöма «Коми календар» удж. Йöзöдöм вылö сьöмсö вичмöдiс «Суоми-Россия» котыр. Содтöд тираж лэдзöма Коми республикаса войтырсикас политика министерстволöн сьöм отсöгöн. «Коми календар. 2009 во» дасьтiсны коми том войтырлöн «МИ» котырö пырысьяс. Коми календар празьникъяс йылысь гижисны Кыв, литература да история институтса фольклор секторын уджалысьяс Людмила Лобанова (Л.Л.) да Öльöш Рассыхаев (Ö.Р.). Важ коми ворсöм да йöктöм подув вылын öнiя кадся ворсöмъяссö гижис Людмила Камбалова (Л.К.). Коми йöзкостса паськöм йылысь гижöдсö дасьтiс Коми республикаса фин-йöгра культура шöринын уджалысь Наталья Чаланова (Н.Ч.), коми сёян дасьтанног йылысь – Юркарса коми культура шöринöн веськöдлысь Валентина Самарина (В.С.) да сэнi уджалысь Ольга Аверина (О.А.). Гижöдъяссö редактируйтiс «Чушканзi» журналса шеф-редактор Григорий Хатанзейский. Небöгбанö серпассö лöсьöдiс Искусствояс колледжын велöдчысь Роман Зварич. Гижöдъяссö öти небöгö пукталiс да тöрöдiс «Кола» небöг лэдзан котырöн веськöдлысь Микулай Вахнин. Небöг дасьтан öтувъя уджнас веськöдлiс Öльöш Рассыхаев.