Ахвяраваць Беларускую кнігу – дзецям

38 подписчиков

Зь верасьня 2008 года пачалася акцыя "Беларускую кнігу – дзецям!" Моладзевыя актывісты па ўсёй краіне зьбіраюць кніжкі для дзіцячых дамоў. Таму мы зьвяртаемся да Вас: Ня будзьце абыякавымі! Далучайцеся, калі ласка, па меры мажлівасьці да акцыя ня толькі ахвяруючы кніжкі, але і ў інфармацыйным пляне. Сёньня бібліятэкі дзяржаўных установаў, у тым ліку дзіцячых дамоў і інтэрнатаў, у асноўным камплектуюцца расейскамоўнымі кнігамі, родная мова бывае прадстаўлена выключна выданьнямі яшчэ савецкага часу. Мы хочам даць магчымасьць беларускім дзецям, якія апынуліся ў складанай сытуацыі, зь дзяцінства чытаць менавіта сучасныя, цікавыя і карысныя беларускамоўныя кніжкі. Мы хочам данесьці да маладых беларусаў чароўнасьць, мілагучнасьць і прыгожосьць роднай мовы. Мы лічым, што дзяржава не займаецца належным чынам выхаваньнем новага пакаленьня беларусаў, бо абмяжоўвае маральнае і юрыдычнае права моладзі атрымліваць адукацыю на роднай мове, вывучаць гісторыю Бацькаўшчыны, знаёміцца з творамі нацыянальнай і сусьветнай літаратуры, чытаць пра культурныя і грамадзкія падзеі на роднай мове. Мы перакананы, што выхаваць сапраўдных патрыётаў можна толькі на грунце сапраўдных беларускіх каштоўнасьцяў і традыцый, аднак, палітыка ўладаў, скіраваная на выцісканьне беларускай мовы з усіх сфэраў жыцьця ня толькі не спрыяе гэтаму, а наадварот стварае значныя перашкоды.