Выстава нямецкіх фатографаў FotoKunst

126 подписчиков

Выстава прапануе выбраныя творы фотамастакоў, якія на працягу гадоў і нават дзесяцігодзьдзяў зрабілі фатаграфію асноўным сродкам сваёй мастацкай творчасьці ці выкарыстоўваюць яе як раўнапраўную побач зь іншымі формамі мастацкага выражэньня — жывапісам, графікай, пэрформансам. Яны належаць да розных пакаленьняў, прадстаўляюць разнастайныя зыходныя пункты і пазыцыі, рознымі спосабамі выкарыстоўваюць фатаграфію як сродак перадачы інфармацыі. Якраз гэта і дае магчымасьць зазірнуць у разнастайнасьць фотамастацтва ў Германіі. Абмежаваньне невялікай колькасьцю імёнаў значыць адмову ад шырокага агляду, але таксама і шанец больш інтэнсіўна пазнаёміцца з працамі адабраных мастакоў. Восем падборак творчасьці складзены як маленькія рэтраспэктывы. Адмежаваць і ўпарадкаваць мастацкія працы ад проста фатаграфіі ўнутры шырокага поля фатаграфіі — гэта цяжкая задача. Вядомы куратар фотавыставаў у Нямеччыне Вульф Герцогенрат піша ў прадмове да каталёгу выставы «ФотаМастацтва»: «Мастакі кожны па-рознаму выкарыстоўваюць фатаграфію, але тады хто такі фотамастак? Трэба было б спачатку назваць мастаком кагосьці, хто са сваімі працамі не выконвае ніякай замовы: часта цытаванага „свабоднага мастака“. Фотамастакі ў такім выпадку тыя, хто выкарыстоўвае фотатэхніку для рэалізацыі сваіх творчых ідэй і разумее фатаграфію як самастойны сродак выражэньня іх мастацкага паведамленьня». Фотамастак выкарыстоўвае фотаздымак, каб зь яго дапамогай нешта сказаць, а менавіта — тое, што не можа быць выказана візуальна нічым іншым, як толькі сродкам фатаграфіі. Фатаграфія стварае новыя вобразы, магчымыя толькі дзякуючы яе тэхніцы. Фотамастак выкарыстоўвае сродкі фатаграфіі як сваю палітру: зьмены фармату, камбінацыі вобразаў, часткова як быццам у дыптыху ці алтарных камбінацыях, калажы, хімічныя працэсы і так званыя «памылкі», танчэйшыя нюансіроўкі адценьняў колераў, рэклямныя стратэгіі масавых камунікацый і так далей. Выстава «ФотаМастацтва» не прэтэндуе на тое, каб даць агляд сучаснага фотамастацтва ў Германіі. Яна дае магчымасьць зазірнуць у фатаграфічную творчасьць некаторых мастачак і мастакоў, якія вызначалі вобраз мастацкай фатаграфіі ў Германіі ў 1990-я. Мастакі: Дытэр Апэльт, Ганна і Бэрнгард Блюмэ, Томас Флоршутц, Юрген Клаўке, Астрыд Кляйн, Зігмар Польке, Клаўс Рынке, Катарына Зівердынг Адкрыцьцё ў Менску 23 верасьня ў 17 гадзін выстава дзейнічае да 26 верасня http://generation.by