Віртуальная Брахалка

Вельмі паважаныя, меджду протчым, мадамы і мусьі! Брахалкай мянчане да рэвалюцыі называлі Высокі рынак, Катэдральны пляц, альбо Саборную плошчу, якую немцы падчас апошняй акупацыі назвалі Адольфгітлерпляц, а сёння завецца пляц Волі, альбо плошча Свабоды. Гэта быў не проста галоўны, а, меджду протчым, адзіны пляц у Менску. Тут у розныя часы знаходзіліся ратуша, катэдры, кляштары, гатэль, гасцінны двор, тэатр, сквэр, прысутныя месцы і рынак-барахолка, меджду протчым. Але заўсёды тут было людна. Людзі хадзілі, гандлявалі, жабравалі, чыталі прамовы і - брахалі, брахалі і брахалі. Здавалася б, мае панечкі і паночкі, што ў гэтым такога? А справа ў тым, што наша Расейская Імпэрыя - гэта, меджду протчым, Трэцяя Рымская Імперыя. А ў рымлян такія плошчы называлася, меджду протчым, Форумамі. А што рабілі там гэныя рымляне? Вядома, не спалі ў шапку, а брахалі, брахалі і брахалі! Дык навошта нам, тутэйшым, ствараць Віртуальны Форум, калі мы маем такую цудоўную тутэйшую назву, як Брахалка? Не спіце ў шапку! Брахайце аб усім: політыцы, гандлю, асвеце, свабодных профэсіях ды іншых цікавых рэчах. Сардэчна вітаем Вас на Віртуальнай Брахалцы!