Be Free! Фэст беларускага року. Чарнігаў!

22-23 жніўня 2009 г. ў Чарнігаве (Украіна) пройдзе міжнародны фэстываль “Be Free". Арганізатары – музычны лэйбл БМАgroup ("Беларуская музычная альтэрнатыва"), Еўрапейскае Радыё для Беларусі і моладзевая ініцыятыва “СтудФармат”, ужо трэці год выбіраюць Украіну месцам сустрэчы беларускіх, украінскіх і польскіх фанатаў музыкі ў стылі рок. Партнёрам з украінскага боку з’яўляюцца Грамадскі цэнтр правоў чалавека (Чарнігаў) і Чарнігаўскі рок-клуб. У мінулых гадах пад слоганам “Права быць свабодным” і Be Free фэст адбываўся ў Луцку і Львове. На ім выступалі Krama, ULIS, Neuro Dubel, Zygimont vaza, WZ-ORKIESTRA, Pomidor/OFF, Zet, Стары Ольса. Заяўкі ад жадаючых ДА 28 ЛІПЕНЯ прымаюцца на мэйл fest.svabody@gmail.com. Фэстываль "Be Free" – гэта першы міжнародны рок-фэст такога масштаба, ідэя якога належыць ініцыятывам з Беларусі. Слова арганізатарам: Віталь Супрановіч, прадстаўляючы лэйбл BMA-group, тлумачыць ідэю фэста: “Свабода неразрыўна звязаная з моладзевай музыкай і культурай. Моладзь сама выбірае што, дзе і калі ёй слухаць, а музыканты павінны мець мажлівасці выступаць перад самай рознай публікай. І важна, каб такая мажлівасць была не адзіная. Пасля фэстываляў у Луцку і Львове нас літаральна “закідалі” просьбамі працягнуць фэст у наступным годзе. Ужо зараз мы маем некалькі дзясяткаў заявак ад гуртоў”. Праўда, арганізатары папярэджваюць, што колькасьць і час выступу гуртоў будуць абмежаваныя часовымі рамкамі і бюджэтам фэстываля. На дадзены момант вядуцца перамовы з шэрагам патэнцыйных спонсараў на Украіне і ў Польшчы. У мінулым годзе адным з галоўных інфармацыйных спонсараў выступіў тэлеканал “БелСат”, запланаваны тэле і радыёверсіі канцэртаў і ў гэтым годзе. Адзін з арганізатараў фэстываля, лідар рок-гурта ULIS, Слава Корань, звяртае увагу на еўрапейскі кантэкст акцыі: “Беларусь - ці не адзіная краіна ў цэнтры Еўропы, пра рэальную моладзевую культуру якой практычна нідзе не вядома. Нават у суседніх краінах мала ведаюць пра тое, што ў Беларусі ёсць шмат рок- і не толькі рок-гуртоў, граючых сучасную музыку на прафесійным узроўні. Нашыя выступы разам з польскімі і украінскімі гуртамі стануць мажлівасцю паказаць, што наша музыка – гэта музыка сучаснай Еўропы”. Аляксей Лукашэвіч, з нефармальнай ініцыятывы “СтудФармат” глядзіць у будучыню з аптымізмам: “Сам слоган гэтага года - Be Free! – адлюстроўвае галоўную цэннасць фэстываля - яго адкрытасць і нефармальнасць. Мы чакаем, што на нашыя канцэрты прыедуць тысячы маладых людзей, студэнтаў з усёй Беларусі, а львоўская публіка, турысты з Польшчы і іншых Еўрапейскіх краін, змогуць параўнаць узровень прафесіяналізму зорак сваіх краін і Беларусі. Але галоўнае – фэстываль стане мажлівасцю праявіць сябе, даведацца больш адзін пра аднаго і пра іншых.